contrast2.jpgcontrast1.jpg
Уроки по Joomla можно найти здесь: http://joomla25.ru/
Шаблоны Joomla 2.5 здесь: http://joomla25.ru/shablony/

Новости

Сунтаар саңа суруйааччыта

Хайа баҕарар суруйар идэлээх киhиэхэ кинигэтэ тахсыыта – туохха да тэңнэммэт улахан үөрүү буолар.  Бу үөрүү өссө улаатар, өскөтүн, дьон-сэргэ сэңээрэр-атыылаhар, ааҕар, ырытар буоллаҕына. Ол курдук, тохсунньу 31 күнүгэр, өрөспүүбүлүкэҕэ Ыччат сылын көрсө, Сунтаар килбэйэр киинигэр- Ыччат дьиэтигэр, саңа тахсан эрэр талаан – Лиана Ю, ыра санаата туолан,  бастакы, күндүттэн күндү «Аҕа Ийэ Күнэ-ыйа», «Мотылек, Дракоша и другие…», «Оҕо сааһым сарсыардата» диэн кинигэлэрэ  күн сирин көрбүттэрин сүрэхтээhинэ буолан ааста.  

Лиана – төрөөбүт-үөскээбит Элгээйитин «Кулуhун»,  Сунтаар улууhун «Ньургуhун»  литературнай түмсүүлэрин биир көрдөөх-нардаах, активнай чилиэнэ буолар. Оҕо эрдэҕиттэн хомоҕой тыллаах хоhоону суруйар. Кини атыттартан уратыта диэн бу хоhоонноро оҕолорго аналлаахтар.  Лиана Ю хоhоонноро оҕоҕо олус чугастар, оҕо бэйэтэ суруйбутунуу судургулар, ыраастар, сырдыктар.

 

gdsgdsgds

 

  Кинигэлэри  сүрэхтээhини Сунтаар улууhун киин библиотекатын  үлэhиттэрэ Алексеева М.Л., Федорова Л.С.   иилээн-саҕалаан бэрт сэргэхтик ыыттылар. Кинигэ презентациятыгар кэлбит ыалдьыттар Лиана Юга айар үлэтигэр, тус бэйэтигэр баҕа санаа бастынын, үтүө санаа үтүмэнин анаатылар. 

Бу тахсыбыт дьоҕус кинигэлэрэ уус-уран айымньыны сэргээччилэргэ, оскуола алын уонна орто сүһүөҕүн үөрэнээччилэригэр, учууталларга уонна төрөппүттэргэ ананаллар.   Лиана Ю  кинигэлэрэ  киэң  араңаҕа тахсан дьон-сэргэ, оҕо-аймах биhирэбилин ылыа, илииттэн илиигэ сылдьар кинигэ буолуохтара диэн эрэнэбит. Саңа тахсан эрэр эдэр суруйааччы кыыспытыгар айар аартыга  арыллан истин диэн баҕа санаабыт бастынын аныыбыт.

Сунтарская районная библиотека